立法會財務委員會未能喺政府宣稱嘅二月死線通過廣深港高速鐵路香港段工程、涉款一百九十六億元嘅追加撥款申請，財委會今個月就要繼續努力，但泛民主派議員繼續拉布，而且有政黨早已呼籲喺財委會加會期間到立法會示威。負責主持高鐵追撥會議嘅財委會副主席陳鑑林（橄欖）亦出招，使出大鉸剪剪布，將泛民議員就高鐵撥款申請提出嘅一千二百幾項臨時動議，大刀闊斧咁「剪」淨卅六項。
財委會至尋日就收到十九名泛民議員提出合共一千二百六十二項臨時動議，其中社民連長毛梁國雄就提出咗五百五十二項，係提交得最多臨時動議嘅議員。雖然臨時動議好多，但橄欖就以內容重複及臨時動議與撥款申請唔係直接相關為由，「剪」到得番卅六項，其中被指與撥款申請不直接相關嘅就有一千零六十一項，另有至少一百六十項就被指內容重複，議員要自行整合，再喺今朝交回秘書處，否則唔會喺會上處理。
立會保安方面，立法會行政管理委員會早前已經授權秘書處可要求警方到立法會示威區候勤，橄欖亦講明如有衝突就交由立法會保安同警方處理。相信鑑於上次泛民佔領主席台嘅經驗，橄欖同秘書處都會做好搬竇開會準備，睇嚟橄欖已着好晒全副武裝，剪布勢在必行。
卓妮