中環出更：家家有族譜 「誌」小有認識
東華三院何超蕸檔案及文物中心日前舉行開幕暨命名典禮，用作有系統地修復及儲存東華大量歷史檔案及文物，包括一九二五年廣華醫院總冊。卓妮在活動上見到一班董事局成員對文物相當好奇，部分仲諗起自己家族收藏嘅族譜添！副主席王賢誌（Vinci）話，雖然佢冇見過族譜真身，但自細爸爸王忠桐都有同佢講吓族譜，佢仲識得背族譜入面嘅對聯。
Vinci話，佢爸爸名字入面個「忠」字，同佢個「賢」字就係來自對聯其中一句「忠賢傳世家」入面的「忠賢」兩個字。不過，佢就笑笑口話每個細路都唔鍾意自己個名筆畫多，但了解過呢個傳統之後就學識欣賞喇。
東華文物中心 半年內就緒
同場嘅總理馬清揚話，家族每次有新成員出世都會加名入族譜，然後印番份副本畀大家保存，睇嚟遲啲都要數碼化至得，萬一遺失都唔會失傳嘛！不過，依家份正本放喺邊個親戚度佢都要問番先知，但佢已經記住將來個孫改名要用個「禧」字喇。
至於前主席施榮恆嘅家族族譜就放咗喺家鄉福建個祠堂，由村長保管，有時佢都會帶小朋友返去講解吓家族傳統，但有時同宗移民咗去外國，改名可能未必跟足規矩。主席何超蕸就話，今次是首間大型慈善機構以自資物業成立永久檔案及文物中心，設檔案及文物庫、修復室及數碼工作室等，預計四、五個月後服務就緒。
卓妮