王家衛電影《重慶森林》描述兩段愛情故事，既浪漫又迷離，取景地尖沙咀重慶大廈仲被影迷視為浪漫勝地添。可惜吖，電影歸電影，現實歸現實，現實中嘅重慶大廈唔止一啲都唔浪漫，而且烏煙瘴氣，尤其近年大批假難民進駐，更加搞到七國咁亂，成為治安計時炸彈。
話口未完又嚟嘞，多名中東遊客前日光顧重慶大廈，先係被「劏」，接住被南亞幫暴力襲擊，血濺當場。本報記者連日來直擊亦發現，重慶大廈由朝到晚都有大批南亞同非洲裔人士聚集，唔係喺大廈內外徘徊，就係喺後巷集結，有啲甚至被本地黑幫招攬添。呢批南亞同非洲裔人士絕大部分係假難民，佢哋四圍遊蕩，好似找尋獵物咁，途人固然備受滋擾，商戶更加冇啖好食。
正如有商戶話齋，假難民佔據重慶大廈，導致盜賊如毛，罪案無日無之，唔止令大廈形象受損，商戶生意亦大受影響，希望當局盡快解決假難民問題，令重慶大廈回復寧靜。其實，警方唔係唔知道重慶大廈烏煙瘴氣，而係束手無策，近期已加派人手巡邏，問題係呢班假難民膽正命平，孔武有力，而且人多勢眾，連警察都冇佢哋符。
呢，曾經有軍裝警員去重慶大廈處理一宗糾紛，結果被一名南亞漢當人肉沙包，連環九拳打到入院；去年五月，亦有一名南亞人士喺重慶大廈對開被八名同鄉圍斬，幾乎冇命；而講到轟動，莫過於一三年六月發生嘅風化案，一名北京來港旅遊嘅女大學生，喺重慶大廈賓館內被一名提出酷刑聲請嘅印度漢強姦，震驚中港兩地。
所以話，綿綿不絕，必有亂結，隨着假難民愈來愈多，重慶大廈固然成為生人勿近嘅九反之地，中環蘭桂坊更淪為人間妖域添。有人形容呢兩個地方已經成為化外之地，就好似當年「三不管」嘅九龍城寨咁，一啲都冇誇張o架。
正所謂，蛇有蛇路，鼠有鼠路，假難民之所以源源不絕，皆因有人喺背後操控。本報早前獨家踢爆黑幫和勝和前坐館「上海仔」組織假難民僱傭兵團，派兵頭到非洲及南亞等地「揀蟀」受訓，再安排偷渡來港，然後滲透全港多區，從事各種非法勾當，搶劫、販毒、收數、打交、貼抹黑街招、恐嚇勒索等等，無惡不作，無法無天。
係人都知，假難民唔止造成嚴重嘅社會治安問題，仲成為港府沉重嘅財政負擔，淨係下一年度咋，政府為處理免遣返聲請嘅開支預料增加到十七億元，你話納稅人係咪冤枉吖？香港話就話係國際都會，可惜金玉其外，敗絮其中，區區有假難民，處處人間妖域，當局再唔盡快諗辦法解決，何止重慶大廈及蘭桂坊淪陷，成個香港遲早變成「假難民森林」都似！