新一份預算案將寬免差餉嘅每戶上限，由去年嘅兩季各二千五百元，調整至今年嘅四季各一千元，全年總數其實仲少咗一千蚊，但財政司司長曾俊華（鬍鬚曾）就聲言，拆開做四季嚟寬免差餉，對多數持有或租住細價樓嘅基層市民較有利。不過有議員就踢爆，好少業主會將寬免咗嘅差餉退番畀啲租客，質疑有關措施幫唔到基層，不及向市民派發現金直接。政府官員點回應呢？佢居然話退唔退番啲差餉，係業主同租客之間嘅合約問題。即係錢就派咗嘞，但啲錢最後落喺邊個手上，政府就闊佬懶理喇！
