政情：「芬」擔湊仔工作 只信親人
香港唔少雙職父母都依靠外傭或託兒服務照顧子女，但亦有例外嘅例子，好似育有兩名兒子嘅立法會議員梁美芬話，兩個仔細個時只會交畀信任嘅人照顧，又笑言自己「執到支好籌」，因為本身教書嘅老公可以教阿仔做功課同溫習，而佢就負責同阿仔玩遊戲，順便培養埋感情。
腰骨痛 兩個夠晒數
梁美芬尋日舉行記者會，談及改善託兒服務，幫助婦女就業嘅建議時，分享自己湊仔經驗，指兩名兒子相差十四個月，佢同老公一旦病咗或外遊，只會交畀姨媽或家姐湊。佢又認為，有無人照顧子女，好影響媽媽出外工作嘅意欲，甚至係生育問題。
當問及當年有無諗住生多個，梁美芬自言雖然好鍾意小朋友，但當年腰骨痛，打算抖下，所以最終只係生咗兩個。