政情：超級議席民協街工難掹車邊
立法會俗稱「超級區議會」嘅區議會第二功能界別合共有五席，向來被視為兵家必爭之地，其中現任超級議員民協馮檢基（阿基），去年底區議會選舉落敗後，既苦惱自己出路，又希望民協新生代接棒延續超級議席影響力，點知早前殺出個程咬金，身兼葵青區議員嘅街工梁耀忠，以及西貢區議員嘅新民主同盟（新同盟）范國威忽然表態考慮轉戰超級議席，但選舉始終係講實力，若以知名度及地區樁腳實力為標準，綜觀以上要素，民協及街工代表會被篩走，范國威搭上尾班車嘅機會被睇高一線。
泛民陣營爭取於超級議席力保三席，基於兩名現任超級議員阿基及民主黨（白鴿黨）何俊仁於去年底區選落敗，失去超級議席入場券，預料角逐連任嘅只有白鴿黨涂謹申，據知白鴿黨亦會派出乳鴿，例如元朗區議員鄺俊宇或南區區議員區諾軒於另一張名單排頭位，爭取該黨於超級議席「坐一望二」，至於超級議席最後一席，據知民協、街工及新同盟三方都蠢蠢欲動欲染指。
「超級基」後繼無人
還記得四年前，阿基突然跳出九龍西成功變身「超級基」，不過今年九月立法會選舉無呢支歌仔唱，因為佢已失去超級議席參選人入場券，民協有意改派深水埗區議員何啟明延續超級議席控制權，然而何啟明同阿基嘅知名度「不可同日而語」，難以獲得泛民其他陣營中人「開綠燈」支持。
至於長期經營新界西嘅街工，以及盤據新界東嘅新同盟，兩者都有具知名度嘅「雙料議員」梁耀忠及范國威，之不過街工一方如要挑戰超級議席，首要解決嘅問題係要向其他泛民中人借提名票，否則無法入場參戰；新同盟本身剛好有十五名民選區議員，等於超級議席嘅入場券，加上區選嘅勝出率強橫，若然范國威決定跳出新東，趕上超級議席尾班車，預料將主打本土旗號，盡攬本土派、傘兵支持票，與白鴿黨兩張名單嘅定位有清晰嘅分野，唯一要解決係由誰人頂上，力保原有嘅新東議席。
建制派大局已定
相對泛民於超級議席嘅爭崩頭，建制派嘅形勢就比較穩定，基本格局係「二加一」，即民建聯主席李慧琼孖住剛喺新東補選落敗嘅周浩鼎，加上再次轉換跑道嘅工聯會王國興，至於四年前建制派議員謝偉俊嘅另一半，突然出戰超級議席並吸走六萬多票，據知歷史不會重演，因此如無意外將會係泛民及建制三對三對決，六張名單爭取五個議席嘅格局，就看誰人最後被淘汰，與超級議員銜頭擦身而過。