中環出更：肥佬黎又同三老鴿密會
立法會新界東補選結果上月底塵埃落定，壹傳媒集團前主席黎智英（肥佬黎）、外號「李漢奸」嘅民主黨創黨主席李柱銘等人短短五日內兩度密會！李柱銘、白鴿黨兩名前主席「AV仁」何俊仁及李永達三人，尋日更罕有地於中午到肥佬黎位於何文田嘅寓所密會，莫非眾人於新東補選後，要盡快就九月選戰指指點點，特別係泛民參選名單提早做決定？
踏入二○一六年，肥佬黎、李漢奸等人最少五次密會攪局，包括尋日一反常態，由過去喺晚上改為於中午密會。尋日中午十二時廿分，李漢奸、AV仁同李永達三人，於肥佬黎司機駕駛嘅私家車接送至肥佬黎寓所，眾人密會約兩小時，李漢奸等人於下午二時廿分齊齊離開。
疑提早謀選戰
事實上，新東補選由主流泛民支持嘅公民黨楊岳橋當選後，肥佬黎、李漢奸等人最少兩度密會，令人懷疑係為新東補選作賽後檢討，包括如何應對本土派嘅勢力進一步抬頭；再者佔中發起人戴耀廷最近四出推銷「雷動計劃」，拉攏泛民共同爭取喺九月選戰中取得過半立法會議席，莫非眾人亦趁機提早定調，決定係咪參與該計劃？
卓妮