中環出更：團結五邑 「羅」列景點特產
香港近年有形形式式嘅同鄉會成立，將同聲同氣嘅人連繫埋一齊，好似最近有香港五邑總會（總會）成立，並舉行首屆理監事就職典禮，身為五邑人嘅發展局局長政治助理馮英倫（Allen）話，五邑特產包括新會陳皮，直言夠晒出名，而總會副會長羅台秦（Louisa）接力推銷當地嘅陳皮燒鵝，其後又如導遊上身列舉五邑文化景點，反問「又有得玩有得食，仲想點呀！」
香港五邑總會早前舉行首屆理監事就職典禮，會長岑少雄話，總會嘅成立象徵六十多個五邑社團團結，目標係希望服務全港逾一百三十萬嘅五邑人。
馮英倫力薦新會陳皮
同場仲有已走入官場嘅Allen，佢話已經無乜親戚喺五邑住，已經好少返去。當問及五邑有咩特產好介紹，佢就第一時間講出新會陳皮，直言夠晒出名，但佢同時以過來人身份，告誡大家咪以為陳皮好食，用嚟製陳皮嘅新會柑就好食喎！
本身係台灣人嘅Louisa，於五邑一帶有唔少投資，加上每年都會去五邑四、五次，因此同五邑關係都好密切，佢其後更落力推介五邑，一方面指試過喺當地浸溫泉，有助令身心放鬆，另一方面又指當地有清末學者梁啟超故居等文化景點，唔講仲以為有專門帶團到五邑嘅導遊在場。
另一總會副會長甄韋喬（Mickey）去年參加交流團時，細仔廷翰唔怕悶陪伴在側，今次Mickey就任副會長，廷翰亦有到場支持，據知現年十三歲嘅廷翰身高約一米七，又鍾意打籃球，而且有意向入港隊嘅目標進發，唔知Mickey會否全力支持廷翰嘅志向呢？
卓妮