大量「假難民」濫用酷刑聲請機制，湧港打黑工或從事不法活動，特首梁振英早前表明不排除香港會退出聯合國《禁止酷刑公約》。一向「泛政治化」嘅新民主同盟立法會議員范國威（Gary），尋日又喺立法會上亂噏，質疑港府密謀退出公約與佔領行動（佔中）有關，又將免遣返聲請同單程證類比，到底佢知唔知自己噏乜呢？
話說保安局局長黎棟國尋日於立法會回應議員有關酷刑聲請嘅口頭質詢時，Gary忽然發表「偉論」，批評港府對同屬移民政策嘅「單程證」制度置若罔聞，只關注酷刑聲請制度。
佢又話聯合國酷刑公約委員會早前表明，會就港府於佔領行動期間涉嫌濫用武力進行獨立調查，質疑港府研究退出公約係「存心報復」喎。黎棟國對Gary嘅言論表示不明所以，強調單程證喺香港已推行咗頗長時間，同酷刑聲請係兩碼子嘅事，唔希望將兩者混為一談。