政情：吳得掂慶生 緊要過學生
全港性系統評估（TSA）引起嘅操練文化引起全城爭議，立法會教育事務委員會就喺去年底特別舉行TSA公聽會，但教育局局長吳克儉（吳得掂）就以私人理由缺席，最後被人踢爆原來為咗去日本賞紅葉，懶理教育問題。究竟吳得掂點解一定要去賞紅葉呢？本報再三打聽下，原來召開公聽會當日，即係十一月廿九號，正正就係吳得掂嘅生日，終於都真相大白喇！
事後厚顏分享旅行心得
當日TSA公聽會邀請咗小學生同家長出席公聽會發表對小三TSA嘅意見，當中有幾位小三學生分享。當時立法會示威區亦都有集會，超過一百名家長帶同小朋友出席，要求立即取消小三TSA。吳得掂被踢爆去日本而缺席公聽會，回港後出席公開活動時仲唔避嫌分享遊日心得，心得仲多到幾乎可以出版日本攻略，但佢就一味用「私人嘢」、「私人理由」做擋箭牌，唔肯透露係咪去過日本賞紅葉。
日本紅葉年年都有，吳得掂亦可以選擇喺公聽會前後時間出遊，點解堅持喺公聽會當日遊日賞紅葉？原來當日撞正佢六十三歲生日，所以去日本賞紅葉慶祝生日。其實生日外遊大有人在，所以吳得掂生日請假都係人之常情，如果做官凡事要以工作及開會行先，請班尊貴立法會議員都唔好雙重標準，切勿唔開會請假外遊喇，更加唔好借公帑外訪當旅行。
外訪當食生菜 去年15次
不過，衰在吳得掂外訪當「食生菜」，淨係去年就外訪咗十五次，平均每月就外訪一次，加埋放假都唔知離港幾多次喇，所以就算當初坦誠公開自己因為生日而請假都冇用，相信冇人可憐。話口未完，政府尋日又發出新聞公報，指吳得掂今日又去外訪喇，但今次係上京同國家教育部、北京市教育委員會官員進行交流，唔知佢返港後，下次又幾時再起行呢？