中環出更：湯文亮囡囡 生兩個就收工
仁濟醫院尋日舉辦慈善攝影集《活誌 A Book About Lives》新書發布會，主席林煒珊與一班董事局成員拉大隊出席宣傳。卓妮見紀惠集團行政總裁湯文亮（圓圖）嘅囡囡、總理湯振玲神采飛揚，皆因佢四月將會與拍拖唔夠一年嘅男友拉埋天窗，於四季酒店擺婚宴。湯振玲就話，既然雙方都覺得對方適合自己，就唔使再拖喇，仲話婚後會盡快生兒育女，生兩個就收工，聲言唔想做高齡產婦喎！
為宣傳新書，一眾仁濟董事局成員一齊欣賞設計師又一山人幫佢哋拍攝嘅三條短片，內容大致圍繞該醫院員工對多年工作嘅感受領悟、長者尋找退休後嘅興趣、及受助殘障人士嘅日常生活等。林煒珊欣賞完片段後話，難忘與一班長者一齊參與時裝表演，當時搵來時裝設計師幫長者設計同佢哋心願有關嘅服飾，見長者玩得開心，感到好欣慰，又好欣賞有員工於仁濟工作已超過廿年仍毫不厭倦，當長者如親人咁照顧。
「仁」情味感動又一山人
至於又一山人就話，拍攝期間最感動嘅反而係員工嗰部分，可能因為拍攝長者及受助人士片段前已有心理準備，反而拍攝員工時真係冇預計過佢哋會咁有熱誠，有位員工已達退休年齡，但即使女兒叫佢退休都唔肯退，堅持繼續服務，仲話服務長者嘅時候，得到嘅比付出多，令到佢非常意外同感動。
同場仲有副主席嚴徐玉珊、黃美詩、總理鄧肇殷、孫蔡吐媚及鄭李華熙等。講起近排零售界寒冬，身兼卓悅控股副主席助理嘅鄧肇殷話，零售現時非其主打工作，轉而專注於美容中心生意，會相對穩定喎！
卓妮