中環出更：經濟冰封 股息恐派德少
香港經濟步入冰封期，資金流走亦連累港股及港匯大跌，令唔少人荷包大縮水。早前卓妮喺馬場見到中華廠商聯合會副會長史立德（Allen）及「耳機大王」富士高實業主席楊志雄（Johnny），兩人不約而同對經濟前景好悲觀。Allen呻話，佢買咗唔少股票收息，點知股價都蝕咗一大截，擔心上市公司生意難做，下一步可能減少派股息，到時股民就真係雪上加霜喇！
Allen話，依家係低息時代，若將閒錢存放喺銀行確係幾消極，所以都買入唔少高息藍籌股作為長線投資，股息有五、六厘咁多，但係今次大跌市，佢都「唔見咗好多」，坐晒艇喎，仲估計股市跌勢仲未完。
不過，當日佢同太太史顏景蓮名下愛駒爆冷跑第三，帶挈一班朋友贏咗錢，個個都開心晒。
Johnny就話，最近好多業界朋友都呻生意差咗，佢盤耳機生意都唔例外。原本第三季係傳統落訂單嘅旺季，但去年推遲到第四季先至有柯打，反映歐美嘅消費者信心唔夠，經濟復甦步伐仍未穩固。
孝順「愛」媽媽 回星探望
卓妮同場仲見到鄉議局主席劉業強及太太葉愛愛（Judy）。Judy係新加坡人，嫁咗嚟香港近廿年，唔知佢有冇特別掛念家鄉？Judy笑笑口話，唯一掛住嘅係媽媽喎，真係孝順女。Judy仲話，農曆新年就到，佢會留港同家人一齊過，開年後先返娘家探媽媽，諗起就開心。
卓妮