政情：勉「強」搞體育 無幸褔
新一份施政報告提出設立「體育專員」推動香港體育發展，民政事務局副秘書長楊德強成為候任體育專員，負責統籌及協調跨局或跨部門嘅體育工作，不過政圈對於「體育專員」由胎死腹中變成兌現落實都唔多睇好，認為偏離原意似交貨性質，事關當局起初屬意由有聲望兼退役體育界人士，如「亞洲車神」黃金寶出任，最終結果係由政務官出任，亦唔需要向立法會闖關「開位」，因此外界對現屆政府弱勢嘅情況，加上面對立法會多線拉布戰，體育專員嘅作用持保留或觀望態度居多。
開設體育專員一職最早於二○一二年，梁振英競逐特首政綱中提出，而於現屆政府一二年七月上任後，時任民政事務局局長曾德成指，體育專員非問責官員層次，其級別定位要研究，又承認體育專員設立要通過立法會開位或撥款，然而事隔一年半，曾德成於一四年三月首次表明，當局審慎研究後初步認為設立體育專員不可行，原因之一係要搵來自體育界人士統領各方持份者並不容易。
新職或「換湯唔換藥」
及至本月初嘅新一份施政報告，體育專員突然「被落實」，政府委派民政局負責體育政策嘅副秘書長任體育專員，換言之此位置落入於讀書時係運動健將嘅政務官楊德強手中。
有政界中人分析，楊德強最大優勢係熟悉政府內部架構，但從另一角度去睇，更可能係因為於體育界有聲望嘅退役運動員，好多已經被私營機構羅致，加上政府弱勢，未必有人願意此時走入熱廚房，因此要由政務官任體育專員，令人擔心其實係「換湯唔換藥」，未必有嶄新思維去打破唔少體育總會存在嘅山頭主義。
相類「專員」成效不彰
另有政界中人對開設體育專員不存厚望，事關上屆政府早喺一○年已經喺各個區議會委任兩名區議員擔任活力專員，工作包括協助所屬地區爭取更多資源，投入推廣普及體育嘅工作，認為其部分工作性質同體育專員類似，當時成效亦有限，由此觀之，或者楊德強上任後第一件事，就係要於短期內有實質工作，令人覺得體育專員唔係無實權嘅花瓶，實實在在為體育界爭取分配更多資源。