政情：商會「佳」碑 撐林健鋒連任
建制派於去年六月政改方案投票時世紀大甩轆，提出「等埋發叔」嘅立法會總商會代表林健鋒（Jeffrey，圓圖），被指要為此承擔責任，加上Jeffrey任總商會代表超過十年，外界一直盛傳總商會內有聲音想換人，總商會主席彭耀佳尋日出席總商會酒會時開宗明義撐Jeffrey，指如對方尋求連任，自己將會支持。
立法會換屆選舉今年九月舉行，政圈一直關注Jeffrey會否第四度連任總商會代表，彭耀佳於選舉前約八個月，指永遠任何人對任何事都有不同睇法，但Jeffrey好努力做商會嘅工作，總商會有好正面嘅評價，商會連同自己都覺得Jeffrey係好稱職嘅議員。
料今年經營環境更難
對於有傳裕華國貨董事總經理余鵬春亦有意染指總商會代表，彭耀佳指呢啲假設問題答唔到，如果係真嘅話先講喎。
彭耀佳其後談及本港嘅經濟情況，話金融市場開始有大動盪，估計今年經營環境會較困難，而農曆新年後，失業率有機會回升。