中環出更：團體列「10 宗罪」 反廢鑊續任
外號「廢鑊」嘅食物及衞生局前局長周一嶽任內醜聞爭議不絕，其平等機會委員會主席三年任期原定於三月三十一日屆滿，政府早前亦公開招聘下任平機會主席，點知廢鑊被踢爆厚顏報名有意連任平機會主席，消息一出一石激起千重浪，多個團體隨即發起請願力數廢鑊任內十宗罪，並聲言「若聘周一嶽，香港就大鑊」。
性傾向條例家校關注組廿多人尋日喺政府總部外請願，力數廢鑊任內「僭越權責、挑起矛盾、濫用公帑」等十宗罪，先後向特首辦及政制及內地事務局反映意見，並即席表演短劇反廢鑊，包括有人戴上廢鑊肖像嘅面具及黑色手套，手持粉紅色鑊鏟烹調一味名為「香城一鑊熟」嘅菜式，擔心香港會一鑊熟。
倘留低 政府優劣不分
反廢鑊連任平機會主席嘅行動於短時間形成，而且訴求清晰，如果政府繼續有眼無珠，畀廢鑊續任平機會主席，睇怕只會進一步顯示政府嘅優劣不分。
卓妮