政情：今日你上鏡：不在其位「寧」避談政治

前保安局局長黎慶寧依家係香港大學政治與公共行政學系名譽教授，喺碩士課程教授行政管理，難怪尋日我哋喺港大一個論壇上見到佢喇，佢唔只撐場咁簡單，仲有留心寫筆記。不過，佢就話依家專心教書，唔講政治喎！其實黎慶寧回歸後一年就急流勇退，過去多年來行事仲保持低調，尋日如此忍口唔講政治都係貫徹佢嘅作風啫。唔似得其他退休高官咁，走咗都仲說三道四，佢真正做到不在其位、不謀其政。