政情：史立德盼人仔續跌助百業
人民幣臨近年尾愈跌愈甘，但中華廠商聯合會副會長史立德就話，覺得依家人仔仲係太貴，唔少旅客都因此要花多啲錢，寧願去日本等地旅行，影響內地旅遊業，佢就希望人仔會再跌多啲，除咗旅遊之外，都幫到各行各業。
倘太貴增港商成本
史立德話，其實人仔太貴會令內地港商成本增加，加上依家喺內地設廠面對唔少困難，包括內地近年有多方面改革，例如環保同勞工政策等，全部都同廠商有關，成本就進一步提高，不少港商都將廠房搬到東南亞等地，以減輕負擔。
不過，史立德做開大型品牌包裝，生意相對穩定，人仔匯水高對佢影響都唔算太大，暫時亦不打算搬廠房到東南亞，但承認內地營商環境愈來愈困難，如果仔女接得到啲生意，就繼續做落去，做唔住就寧願唔做，早啲退休喎。