中環出更：盤「根」議辦 遇連番狙擊
立法會議員鍾樹根（樹根）去年喺區議會選舉中輸畀「傘兵」徐子見，失去東區區議會漁灣選區議席。雖然樹根已拆除辦事處嘅區議員招牌，但佢仍被指以立法會議員身份霸住舊有區議員辦事處，唔肯搬出讓畀新當選嘅區議員優先使用。徐子見同東區翠灣區議員古桂耀尋日就分別去申訴專員公署及樹根嘅黨友辦事處投訴，並擺街站抗議。
葛珮帆同被投訴
徐子見尋日就聯同沙田區議員葉榮等人去咗申訴專員公署，投訴房屋署違反優先編配辦事處予當區區議員嘅指引，縱容喺區選落敗嘅樹根，以及樹根黨友、喺沙田頌安選區落敗嘅葛珮帆，批評兩人均以立法會議員名義續租辦事處。
投訴樹根嘅仲有古桂耀，佢話向房署查詢租用當區辦事處事宜時發現辦事處仲畀上屆區議員關瑞龍同樹根所屬嘅民建聯租緊，令佢會見市民好唔方便。樹根就回應話，房署嘅指引係講緊當區議員優先編配空置嘅舖位，而佢嗰個就一直用開，所以申請續租。
不過，當初樹根係以區議員身份租用舖位，租期理應到去年底任期屆滿完結，必須交還舖位予房署作重新編配，並非以立法會議員身份續租，房署喺今次事件上係咪有行政失當呢？
卓妮