中環出更：大輝讚錯財爺以剛制柔
恒生管理學院尋日舉行「林大輝鐘樓」命名典禮，多名政商界人士都去捧立法會議員林大輝場，財政司司長曾俊華（鬍鬚曾）亦有出席，致詞時仲同大輝喺台上互戴高帽添。不過，鬍鬚曾呢頭讚大輝四字成語叻，話口未完大輝就即刻噏錯四字詞，原本想讚財爺識「以柔制剛」，但就講錯做「以剛制柔」，莫非想話財爺食過「夜粥」好打得？
鬍鬚曾致詞時提到大輝平時在議會內字字鏗鏘，又話好欣賞大輝最叻就係四字成語，出口成文。之後輪到大輝致詞時，就梗係要賣口乖回禮番兩句啦，佢話有睇財爺網誌，讚鬍鬚曾識四両撥千斤、「以剛制柔」嘅處事方式。不過，說話一出，佢就知自己講錯咗，即刻更正係「以柔制剛」 先啱，笑笑口講多句補鑊，話對方「剛柔並重」。
張華強做「村長」抱美人歸
恒管校務委員會主席鄭慕智（Moses）就話，一間學校嘅地標係好重要，好似佢中學時校舍嘅紅磚牆就係好多同學最懷念嘅地方，好有歸屬感。至於講起近日有關於師生戀嘅報道，Moses就話自己中學時都係一舊飯，唔會諗呢啲嘢，淨係掛住參加合唱團同打網球等，笑言一直到大學畢業前一年先突然醒覺要識女仔喎。
同場仲有香港青年聯會顧問葉振都、潮洲商會會董劉文文及青年工業家協會會長張華強。
原來張華強係恒管三十年前第二屆舊生，猶記得當年宿舍分東南西北上下幾座，佢就住喺「西下」座，同學間俗稱佢係西下村村長。佢仲透露當年喺度識到一見鍾情嘅老婆，當年曾經過隔籬座幫對方捉老鼠，最終抱得美人歸，現重回校舍勾起美好回憶。
卓妮