新一屆十八區區議會正、副主席陸續出爐，其中民建聯元朗區議員梁志祥日前以四票之差輸咗畀鄉事派沈豪傑，因而失落做咗兩屆嘅區議會主席寶座。事隔一日，梁志祥似乎已經平復心情，仲話做咗八年主席，唔會眷戀呢個位置，角逐連任只係想延續番之前嘅工作。佢又提到，新界嚟緊有唔少發展項目，鄉事派都非常關注房屋發展，由於佢本身無土地利益，如果由佢做主席，喺處理土地問題時就會公正啲喎。如果係咁，點解鄉事派唔撐佢做主席？抑或係跌咗落地拿番揸沙呢？
