中環出更：玩轉歷史 具細無遺
香港有唔少玩具愛好者，玩具業界亦有聲音希望成立一個永久的玩具博物館，但講咗幾年，一直只聞樓梯響，唔知幾時有得睇呢？雖然永久玩具博物館十畫都未有一撇，但工業總會顧問兼已退休玩具界老行尊楊子江就透露，業界會喺明年初率先同香港歷史博物館合辦一個本地玩具歷史展，與公眾一同重拾童真。
香港玩具協會與香港玩具廠商會早前舉辦玩具業周年晚會暨傑出成就獎頒獎典禮，美昌集團副總裁顏吳餘英（顏太）及楊子江分別獲頒傑出成就獎及傑出貢獻獎。楊子江話，玩具係見證每一代人成長嘅集體回憶，其實幾年前已經開始爭取建立一個屬於香港人的永久玩具博物館，但因為估計最少需要約二萬呎地方，目前仍在尋覓合適場地。
講起以前好多玩具都係自己製作，顏太話唔止玩具，佢中學時連件校服都係自己一手縫製出來，通常用一、兩日放學時間就已經可以完成，着上身後相當有成功感，縫完校服仲可以順便縫多幾個豆袋仔攞嚟拋，喺玩之前就已經先享受製作嘅過程同滿足感，雙重樂趣。
細細個砌玩具 顏明秀做白老鼠
當晚出席的仲有工總主席鄭文聰及副主席嚴志明、玩具協會主席湯誠正、執委丁天立及林凱章等。活動籌委會主席顏明秀話，由於屋企經營玩具廠，佢細個嘅職責就係做「白老鼠」，凡生產新玩具佢都要砌一次，說明書就係根據佢點砌而寫出來。至於香港玩具廠商會會長張光銘細個就比較調皮，會捉「金絲貓」嚟玩，唔知有冇被老師發現呢？
卓妮