立法會正審議被指為「網絡廿三條」嘅《二○一四年版權（修訂）條例草案》（草案），但喺泛民主派議員不斷要求響鐘點算會議法定人數及提出中止待續議案拉布下，都唔知幾時先可以完成審議。有消息話，立法會主席曾鈺成打算破天荒喺下周三特首發表施政報告嘅立法會大會及下周四特首答問大會後，加開會議審議草案。
按照慣例，立法會大會會喺特首宣讀完施政報告後休會，而翌日大會都係喺特首答問大會結束後就完結，兩日都唔會有一般嘅立法會會議。換言之，喺今個星期大會之後，最快都要等到本月二十日先至可以繼續審議草案，所以曾鈺成破例建議下周兩日加會，相信背後唔少得來自政府嘅壓力。
過往施政報告發表後，各黨派都會開記者會交代對施政報告嘅意見，點會仲有時間同心機開會吖。部分泛民已經表明反對加會，如果唔想流會，除非建制派齊齊甘於被「罰坐」會議廳啦。其實草案爭議咁大，就算政府想捐窿捐罅攝位開會，喺泛民拉布同建制派懶懶閒下，分分鐘都係流會收場，有啲嘢係急唔嚟嘅。