政情：阿容爭取充電插座「入席」
新一屆區議會隨着選舉正、副主席後正式展開，其中成功連任嘅工聯會元朗區議員劉桂容（阿容）尋日出席首次區議會會議後，即想到要為同事爭取喺每個座位增設充電插座。阿容話，區議會同事好多時會帶電腦開會，每個位有充電插座可方便同事充電、充手機，毋須自備「尿袋」。有充電插座咁方便，相信大家都會希望阿容能夠「成功爭取」。
元朗區正副主席都叫Wilson
另外，獲鄉事派力撐嘅新任主席沈豪傑與連任副主席嘅王威信「老友鬼鬼」，似乎合作無間。王威信透露，佢同沈豪傑英文名都叫Wilson，就讀同一間中學，係同校師兄弟，長大後亦同為律師，現在更同住YOHO midtown屋苑。咁多巧合，唔通王威信亦同黨友轉軚撐師弟出任主席？