政情：區會功能議席被私有玩輪換
區議會選舉及十八區選舉正副主席後，各黨派又要籌備下月立法會新界東補選及九月換屆選舉，其中由十八區區議員互選產生嘅立法會區議會（一）功能界別議席，據聞已鐵定換人，由年輕一代接棒。原本世代更替係潮流大趨勢，但民建聯（民記）就將有關議席變為黨產，並作為第二梯隊嘅跳板，初步有意「抄橋」學工聯會嘅勞工界議席只可做一屆嘅制度，規定黨員只可以做一屆議員，之後就要轉戰直選。
視為黨產 藉練兵轉戰直選
立法會區議會（一）議席係由十八區四百多名區議員互選產生，但過去曾有聲音建議將呢個議席變為俗稱「超級議席」嘅區議會（二）功能界別議席，認為應由全港市民投票選出一名區議員加入立法會。不過，建制派一定唔贊成建議，眾所周知，建制派區議員最多，要得到呢個議席根本十拿九穩。而建制派內，民記最多區議員，其他建制黨派又唔敢爭位，因而令民記一直獨霸議席，甚至將議席變成黨產。
據知，民記初步打算倣效工聯會兩個立法會勞工界議席只可做一屆嘅制度，規定區議會（一）議席做一屆之後唔可以連任，希望黨員用一屆時間去練兵，下屆必須轉戰直選。至於物色有關議席人選會考慮幾個原則，包括曾當選兩屆區議員以上、曾經擔任區議會正副主席、曾經參與立法會直選。不過，更重要係有關人選嘅地位能夠擺平各方利益，令區議員信服，而且要有潛質喺下屆直選成功。
據悉，有關議席嘅人選包括中西區陳學鋒、深水埗鄭泳舜、北區劉國勳、大埔黃碧嬌、葵青羅競成及元朗呂堅等，都喺考慮之列，但當中以陳學鋒被看高一線。
前車可鑑 隨時兩頭唔到岸
但工聯會呢個制度並唔係好成功，過去只得王國興成功由功能界別轉為直選議員，民記複製工聯會呢個跳板制度，能否成功都係未知之數，如最後真係由陳學鋒接棒，而下屆又未能成功轉戰直選，分分鐘政途就咁止步，疊埋心水做黨務。