中環出更：無公職 一身輕 柯大俠回春
仁濟醫院歷屆總理聯誼會除夕夜假四季酒店舉行倒數派對，唔少名人帶埋家人一齊去玩，聯誼會會長蘇陳偉香見咁多老友留港齊齊迎新年，自然開心晒。卓妮見人稱「柯大俠」嘅思捷環球主席柯清輝同太太拍拖到場，事關佢哋係仁濟總理鄭李華熙（Winnie）多年鄰居，所以一齊嚟送舊迎新。柯大俠望落精神爽利，好似後生咗喎？點知佢笑笑口話：「因為冇做公職嘛！」
做公職好易老咩？柯大俠就笑稱，近期對香港大學連串風波有感而發啫，因為佢做過港大校委會成員六年、城市大學校董會成員十一年，咁啱前幾日政府公布委任李國章做港大校委會主席，又引起一陣矛盾及對立，難怪佢有咁大感觸喇！柯大俠話，佢做校委或校董時，社會及校園氣氛平和啲，依家大學生要求高咗，處理真係棘手啲。唔怪得佢話唔做公職顯得後生喇，因為無咁嬲囉！
仁濟醫院前主席兼時捷集團主席嚴玉麟（Stanley）亦帶埋全家人去玩，包括兒子嚴子杰、新抱嚴韓應心及趣致嘅孫女。Stanley報喜話，新抱又懷有第二胎，暫未知BB係男定女，但佢同太太開心到極。
嚴玉麟自爆生多個「仔」
講講吓，Stanley爆料話，未抱第二個孫之前，佢自己就生多個「仔」先。大家咪誤會，佢講緊嘅係公司最近分拆電子設計業務喺創業板上市。依家個個都呻生意難做，Stanley盤生意受益於智能手機當道，仲可以生「金蛋」，真係羨煞旁人。
卓妮