「老闆，今晚屋企做冬，象拔蚌點賣吖？」
「每隻六百八十蚊。」
「吓，貴咗咁多嘅！」
「嫌貴吖？咁咪食蝦囉，九十六蚊一斤。」
「都係貴喎。」
「咁都嫌貴，不如食白果喇。」
「問過喇，都係好貴吖！」
呢個係笑話，但亦係現實。後日就係冬至，好多家庭主婦都想為家人準備一餐豐富晚飯，可惜今時今日百物騰貴，大有巧婦難為無米炊之嘆。
唔係誇張（口架），本港物價年年上漲，加上唔少個人遊旅客來港掃貨過節，導致食材價格大幅飆升。好似做冬必備嘅海鮮同蔬菜，價錢分別升咗超過一成及兩成，都咪話唔誇張。有菜檔檔主話，未來幾日天氣持續寒冷，菜價仲會進一步飆升添。
柴米油鹽樣樣加價，可惜基層市民嘅收入就無乜增加，生活點會好過吖？有海味店老闆話，經濟差明顯影響銷情，好多顧客改買「中價貨」做節。亦有盆菜館老闆大吐苦水，今年逾半客人都係選購最平嘅傳統盆菜咋。
根據傳統習俗，冬至寓意陰極陽升，生機勃勃，不過香港嘅情況啱啱相反。表面上，家陣失業率唔高，人人有工做，但實際上市道不景，經濟一潭死水，好多打工仔搵朝唔得晚。特別係基層市民人工唔加得幾多，而生活擔子就愈來愈沉重，簡直係度日如年。呢，有政黨調查發現過去五年基層市民用喺購買食材嘅開支比例愈來愈高，其中「悲情城市」天水圍嘅升幅更加係全港之冠添，你話係咪愈窮愈見鬼吖。
冇法子喇，一損俱損，家陣搵食艱難嘅又點止基層市民吖。有飲食業人士指出，冬至本來係傳統旺季，今年情況絕不樂觀，預計生意額會比往年下跌一至兩成；有部分細規模嘅酒樓已經做唔住，隨時爆發裁員及執笠潮都似。飲食業向來係經濟寒暑表，家陣成個行業陷入寒冬，整體經濟前景係點，不言而喻喇。
難為財金高官仲滋油淡定，話美國加息並無引發骨牌效應，預計對香港經濟影響唔大喎。喂，美國啱啱加息，暫時梗係未有影響喇，香港遲早要跟隨，對樓價及經濟必然造成衝擊，呢個道理三歲細路仔都知，港產官僚掉以輕心，唔通真係要等到海嘯殺到至「黐膠紙、釘木板」咩？
點講都好喇，冬至大過年，功夫茶祝願大家有一個豐足而愉快嘅節日。正如有人話齋，世間最令人回味嘅唔係珍饈百味，而係同家人共敍天倫嘅溫馨時光！