政情：今日你上鏡：同事當黑 「始」睇風水

食物及衞生局最近多災多難，繼副局長陳肇始跌傷右手後，局長高永文月初又喺一個長跑開步禮中仆倒，跌至血流滿臉；而政治助理陳凱欣又炒車，幸好冇受傷。因為高永文要放病假養傷，陳肇始就要擔任署理局長，不時帶傷出席不同活動。佢尋日又到威爾斯親王醫院出席器官捐贈感恩禮，致詞時不禁慨嘆辦公室風水唔好，仲話要等高永文復工時，都要諗吓切燒豬、睇吓風水喎，唔知使唔使檻埋火盆呢？陳肇始又透露，高永文身體安好，早前縫針位置已經全部拆線，即使在家中休息，仍好勤力不斷用電郵與同事保持聯絡。