中環出更：葉劉唔怕做「跑道」招新血
區議會選舉剛結束，各黨派都重整旗鼓備戰明年立法會選舉，上月區選首遇滑鐵盧嘅新民黨，主席葉劉淑儀近日頻頻在社交網站發功，招攬年輕人入黨，但佢介紹嘅著名黨員唔係已經退黨轉任政府，就係選舉敗陣，唔通葉劉唔介意再做「跑道」畀年輕人借佢「起機」？
唔使名校出身
葉劉早前批評好多年輕人當佢係「跑道」，利用佢嘅網絡識人跟住加入政府。話口未完，葉劉喺社交網站話，從美國回港九年，先後成立匯賢智庫、新民黨等，吸納好多年輕人才，包括曾任南區區議員、現已官至政制及內地事務局副局長嘅陳岳鵬，同曾任匯賢智庫研究總監嘅教育局政治助理施俊輝，但二人同葉太早已成為過去式；其餘著名黨友有轉居幕後嘅前灣仔區議員黃楚峰，同剛於區選高票落敗嘅前太古城東區議員謝子祺。
不過，葉劉話黨內唔係鬧人才荒，只係區選結果反映選民想多啲年輕面孔參與，所以想招攬有幹勁又捱得嘅後生仔加入。葉劉強調，有志之士唔使名校出身，反正名校生好難留得住佢哋做地區工作，邊間學校畢業都收咁話，簡直係非名校生嘅佳音，但想借葉劉做跑道嘅後生仔就要三思喇。
卓妮