中環出更：李鋈麟玩過山車當體檢
聖誕節即將來臨，元旦新年又接踵而至，有娛樂團體就喺前啟德機場跑道，周三開始舉辦為期三個月嘅東華慈善嘉年華，提供機動遊戲畀愛好刺激嘅市民，既可挑戰膽色，又可以做慈善，唔少名人都躍躍欲試。東華三院副主席李鋈麟就好鍾意玩機動遊戲，月前曾去過新加坡環球影城玩過山車，仲話唔玩唔知身體好添！
沙田馬場尋日舉行東華三院盃賽，出席嘅李鋈麟話，玩過山車嗰陣，心情既驚且怯，相當刺激，個人嘅心臟、血壓、耳水及眼角膜都唔可以有問題，所以玩一次過山車，等於身體又通過一次考驗。佢話外國好多主題公園嘅機動遊戲都夠膽去玩，但內地嘅機動遊戲就例外。因為保養維修令人顧慮，為安全計，佢都盡量唔玩內地嘅機動遊戲。
區宇凡期待置身「陀飛輪」
同場嘅東華三院主席何超蕸就話，即將來臨嘅東華慈善嘉年華，佢最想玩嘅係三百六十度迴旋、有「陀飛輪」之稱嘅機動遊戲。無獨有偶，東華總理區宇凡都話好想試玩。區宇凡話，陀飛輪原本係抵銷地心吸力嘅手錶零件，人若置身其中嘅感覺會係點？真係要試過先至知道。
至於另一位東華三院副主席王賢誌（Vinci）就對機動遊戲唔嚮往，佢話以前為電視台拍攝旅遊玩樂節目，同一部機動遊戲會玩上好幾次以遷就不同拍攝角度，例如美國迪士尼樂園嘅跳樓機，佢就坐咗不下三四次，搞到佢對機動遊戲唔熱衷。不過，Vinci話，如果約埋一班朋友去玩就另作別論，因為三五好友喺機動遊戲度一路玩一路嗌，又確係好過癮嘅。
卓妮