前房屋及規劃地政局局長孫明揚（孫公）多年前曾提出在任期內「一次過」解決丁屋問題，可惜事與願違，現今仍未解決，而且爭議不斷，孫公尋日接受電台節目訪問時承認自己「嗰陣時真係唔識世界，豪言亂語」。不過，孫公似乎未有吸取教訓，指面對土地有限，難以「永生永世」滿足丁權，重提丁屋向高空發展嘅建議，並為丁權劃線，例如十至二十年後就要停止丁權政策，但確保現有原居民及下一代原居民的權益不會受損。孫公唔做官講嘢都零捨放啲，唔知原居民會否覺得佢又再「豪言亂語」呢？
