李志堅：要再多啲肯定！
「堅家軍」的故事，從12年前香港青年軍開始。昔日學生哥逐一進身大港腳，由護級「升降機」變身成爭標分子香港飛馬，球隊名字轉變，人事更迭輪替，哪一天他們會飛的逐夢信念，仍如若初見。「呢個世界總係有人認同有人『葡萄』。」育苗成才背後，「堅Sir」李志堅歷盡風浪，「通過波仔」的心臟依然頂得住：「大業未成，我哋需要再多啲肯定。」猶如港版《足球小將》，下一章節，仍在待續。
「我哋以前出外比賽瞓埋一張床!」操練過後，李志堅如像以往與弟子閒談說笑，只是昔日鬈曲長髮添上斑白，從南華外借回歸的羅港威亦不再稚氣。「以前成日覺得責任好大，人哋屋企交個仔畀你，用人生黃金時間踢波當職業，可大可小。」師承郭家明投身香港青年軍教練，李志堅為小伙子定下逐步目標，從丙組踢上港超，師徒父子朋友情，一言難盡。「郭Sir較顧及球場以外事情，例如家中有事會影響球員情緒，所以我會在小時候管得較多，又要他們讀書保後路。現在仍有八成球員留在球圈，算是實現了其中一個目標。」
勞心勞力捱到通波仔
「堅Sir」去季當選最佳教練，「弟子」梁冠聰及陳肇鈞齊膺「最佳青年球員」，故事至此終結，本應是完美結局。只是人生往往考驗不斷，香港飛馬暫在聯賽落後列強，「堅Sir」笑對壓力：「全世界教練都係受力點，過去成績相對不太重要，訓練時會多點讓年輕球員嘗試不同方法。現在需要平衡，是難了，但這是教練責任。」
去年接受完「通波仔」手術，至今仍要日服4粒藥，「堅Sir」深信頂得住：「做生意更惡劣環境也試過，返大陸求人買貨千萬聲上落，又要等船期擔驚受怕，唔剩止炒魷咁簡單，真係會死人!」男人三十便身兼建材、時裝店及僱傭公司老闆，李志堅的上半場人生，本應是成功典範寫照，他卻偏偏「戇居居去咗教波」。
終極目標：愛徒衝出香港
老闆年代向印傭壓價，執起教鞭角色逆轉，卻事事為小將爭取操心，聯繫學校安撫家長，初上甲組首季便向深水埗要求球員最少月薪8000元。「講夢想都要食飯搭車。如果幾年後人哋仲係畀呢個價錢你，便證明你只係值咁多，唔好又要踢又要怨人工低。幸好佢哋依家表現與態度，起碼見得人。」
人生沒有多少個10年，堅Sir直言難有心力孕育新一批幼苗，卻未是時候功成身退：「球隊表現可以更穩定一點。我心目中有個時間表，當去到某個時候，應該畀佢哋走得更遠，衝出香港發展，會係終極目標。」
圖／文：Kaka