有咁耐風流有咁耐折墮。以前香港被譽為東方之珠，曾經係亞洲四小龍之首，唔知幾威風，可惜好景不常，近年香港好似撞邪咁，頭頭碰着黑，加上內鬥內耗，搞到競爭力跌跌不休，小龍變小蟲。
唔係誇張o架，中國城市競爭力研究會公布嘅最新排行榜顯示，香港連續三年落後於上海，只能排於第二位，兩地距離愈拉愈闊，香港遲早食塵都似；反而深圳就愈追愈貼，今年已進佔第三位，相信好快爬頭。最失禮嘅係，香港喺最具特色旅遊城市排名方面，居然連三十名都入唔到，簡直羞家。
衰開有條路，香港喺城市成長競爭力排名同樣跌跌不休，由去年嘅十三位跌至今年嘅十五位，反而深圳繼續一枝獨秀，高踞榜首。研究會講到明，本來預計深圳GDP今年就可以超越香港，由於受到匯率影響，暫時仲係香港稍為領先，但明年深圳肯定會超過香港。
正所謂，逆水行舟，不進則退，香港淪落到咁嘅地步，完全係咎由自取。好簡單，香港政治紛爭不斷，家嘈屋閉，連版權修訂條例都搞到滿城風雨，有人甚至喺立法會外嘅垃圾桶縱火引爆，問你怕未。反觀深圳一心一意謀發展，由低端製造業城市變身高新產業基地，擁有一大批世界知名科技企業，贏得「中國硅谷」美譽。連調查機構都忍唔住警告香港，深圳即將建成世界科研中心，而香港仲係得個創科局，已錯失好多機會，再唔改變思維，迎頭趕上，遲早會被深圳取代。
話時話，香港原地踏步，一事無成，點止科技產業落後，其他方面同樣問題多多。好似基建工程咁吖，延誤超支成為家常便飯，淨係高鐵就超支近二百億元，即使庫房有大把儲備，都隨時被敗晒喇。同樣一條高鐵，廣深段早已通車，而香港段仲喺度望天打卦，你話醜唔醜吖。
更醜怪嘅係，香港一直以旅遊之都自詡，點知依家居然入唔到最具特色旅遊城市前三十名。研究會認為香港有人唔歡迎旅客，高消費品銷售下跌，應該尋找新發展喎。講就易囉，問題係激進組織無事生非，港府束手無策，無論點樣尋找新發展，都係嘥氣嘅咋。正如學者話齋，香港除咗旅遊欠缺特色，其他經濟方面亦令人擔憂，優勢愈來愈小，前景一啲都唔樂觀。
冇計喇，香港自甘墮落，想唔沉淪都幾難。以前香港成日同新加坡比較，被形容為「雙城記」，可惜時移勢易，家陣莫講話同新加坡冇得比，連深圳都比唔上。咪話功夫茶唔提醒，香港一味食老本，遲早坐食山崩，到時惟有做番條小漁村！