今屆區議會選舉，有多名原先以為「瞓喺度都贏」嘅區選老將爆冷落選，包括民建聯「雙料」議員鍾樹根。不過，年紀仲大過樹根、同樣喺東區參選嘅工聯會立法會議員王國興（阿王），相隔八年再轉區參選都贏，為佢喺回歸後嘅區議會及立法會選舉長勝戰績再添一筆。原來阿王嘅不敗秘訣，就同佢嘅著名反「拉布」口號一樣，都係「日以繼夜、夜以繼日」！
阿王不點名指出，今屆有啲資深議員落選，主因係缺乏危機感，相反佢相隔八年再轉區參選，就一開始已知道係一場硬仗，不能寄望單靠喺立法會嘅知名度勝出，因此佢早一早、夜一夜落區接觸選民。對於有落選雙料議員埋怨立法會拉布，令落區時間大減，佢認為「食得鹹魚抵得渴」，因拉布已成為立法會常態，惟有寧願瞓少啲，盡量抽時間落區。
對於泛民主派最近喺立法會大會、財務委員會及工務小組委員會全方位拉布，阿王對此大表無奈，但強調會奉陪到底，唔怕再次「日以繼夜、夜以繼日」開會。此外，我哋尋日提過阿王曾經喺立法會爆粗，查實佢無論喺會議上或私底下，都從來唔會講粗口嘅。