政情：佔中禍港陳文敏卸得就卸

佔中不在港 圖置身事外

事隔一年，陳文敏尋日出席人權新聞獎活動時主動談到佔中，但佢無提及自己縱容下屬收取捐款、發動佔中一事，只係重申自己於佔中期間唔喺香港，講到佔中期間發生嘅事都與佢無關。佢又話，作為院長嘅責任只係處理行政及教職員工作，管不到學生課外時間做啲咩。既然作為院長要管理教職員，點解佢無管好教職員戴耀廷，任由戴發動佔中？兼夾批准戴收取匿名捐款喺校內搞政治活動？

提到近日嘅港大校委會及副校長人選風波，陳文敏指回歸之後出現幾宗干涉學術自由事件，都顯示由特首出任大學校監嘅制度有問題，建議藉教育學院升格大學一併作出改變。佢建議，教育學院升格大學時要修改教育學院條例，因不涉及開支，到時修例毋須特首批准，立法會議員就可提出取消特首成為院校當然校監，可以成為先例畀壓力其他院校作出改變。

特首成為當然校監已經有長遠歷史，陳文敏咁「痛恨」呢個制度，何解唔喺早年提出，而直到依家先要求修例呢？陳文敏又批評，被傳接任港大校委會主席嘅前教統局局長李國章係一個會引起撕裂嘅人，質疑任命並非為大學利益。陳文敏咁講，莫非因為李國章早前質疑佢無博士學位，並指政黨支持佢做港大副校長，係想喺港大安插「黨委書記」，兼且最終未能當上港大副校長，因而老羞成怒？

學府排名跌 賴準則常變

本港多間大學嘅國際排名近年不斷下跌，有人就認為係同不少大學師生終日掛住搞政治、搞對抗有關。尋日亦有台下嘉賓提及大學排名下跌問題，陳文敏推說不同機構嘅排名準則經常會變，死撐相對於學生參與社會運動，港大副校長風波等政治干預對大學影響更大喎，真係乜都畀佢講晒。