中環出更：周潔冰轉區天后廟陪「嫁」
有百年歷史嘅銅鑼灣避風塘水上天后廟船「三角天后平安堂」，一直尋求上岸，今年終於獲政府撥出銅鑼灣消防局隔籬嘅一幅地建廟，尋日舉行動土儀式。由於新天后廟所屬嘅維園區喺明年新一屆區議會，就會由東區區議會撥歸灣仔區議會，所以當區議員周潔冰亦將會由東區「嫁」過灣仔。周潔冰一出「嫁」，水上天后廟即上岸，連佢都話係奇迹。
水上廟船登岸 灣仔建廟
身兼三角天后平安堂籌委會召集人嘅周潔冰，為水上天后廟上岸爭取咗廿六年，連出席動土儀式嘅東區區議員鍾樹根都話，依家新天后廟終於陪周潔冰「嫁」去灣仔，令灣仔區都有天后廟喇！周就話希望轉區後可令兩個區議會合作得更和諧。
周潔冰話為咗保留原有廟船特色，新廟特別採用船形設計，仲會四面環水，預料造價要一千萬元，所以要周圍「撲水」，未來都會搞慈善晚宴籌款，預料新廟三年後可以落成。佢又話，以前因為廟船喺水上，唔少遊客都搵唔到，又有善信去參拜時唔小心跌落水，希望新廟落成後吸引多啲人去，善信參拜時都安全啲啦！
卓妮