中環出更：琥珀珠寶妍麗無比麗
琥珀思雅及國際琥珀協會早前舉辦「波羅的海琥珀節2015」，鍾情琥珀嘅珠寶設計師羅啟妍都有出席湊熱鬧，佢話每粒琥珀都有其獨特顏色、形狀和香味，亦因為琥珀與佛教有關，所以深受不少亞洲地區人士歡迎。當日卓妮見佢除咗頸上戴有琥珀頸鏈之外，手上仲戴上一枚大大粒嘅琥珀戒指，連波蘭駐港領事都讚佢枚戒指好靚，但羅啟妍即刻細細聲話枚戒指其實係塑膠造嘅，原來背後有苦衷。
羅啟妍話，由於琥珀質地比較脆弱，如果成隻戒指連指環部分都係全琥珀嘅話，就會好容易斷開，佢原本嗰枚琥珀戒指就戴到出現一條裂紋，擔心再繼續戴落去會斷裂，所以就留番喺屋企珍藏，出街就戴枚塑膠造嘅。至於條琥珀頸鏈，因為冇咁容易碰撞到，所以當日佢戴嗰條琥珀頸鏈就係真嘅。
配搭旗袍 格外相襯
當日琥珀節，大會安排咗一個琥珀珠寶時裝表演，以充滿東方色彩味道嘅旗袍配襯琥珀。講起依家好多活動都興玩懷舊旗袍，本身係模特兒嘅旗袍品牌Yi-ming創辦人兼設計師蔡毅明就話，以前與一班外國模特兒一齊出席活動時，亦會間中穿着旗袍，其他人一見到就分辨到佢來自咩國家。而為咗想旗袍睇落有現代感，佢會喺設計加入「方便」嘅元素，例如選用拉鏈而捨棄一排式嘅斜身鈕扣，至於用料、顏色及圖案亦同傳統旗袍有別。
同場仲有珠寶品牌琥珀思雅創辦人崔亮欣（Nancy）、香港歷史博物館及香港文化博物館特約研究員及編輯李惠玲。Nancy話，琥珀間中會有昆蟲被包喺中間，但唔會好似電影情節咁，相隔多年仲喺琥珀入面隻蚊度驗到其他動物嘅DNA喎。
卓妮