北角：爛煙蒂箱跌煙頭礙市容
「煙蒂箱個門鎖爛咗，搞到閂唔到門，連隨入邊啲煙頭都跌晒出嚟，真係嚴重影響市容！」北角居民李先生表示，近日發現英皇道有煙蒂箱出現損毀，導致大量煙蒂掉落地上，影響環境衞生。
已修復及清理
食物環境衞生署發言人證實，該署人員在早前巡查上址時，已發現該煙蒂箱門鎖出現損毀，並隨即派員修復及清理掉落地上的煙蒂。而過去一年，該署並沒有接獲有關投訴。
「有時見到啲煙蒂箱就算冇爛到，但係啲煙頭都塞滿晒成個箱，有啲煙頭照樣跌咗出嚟！」李續指食環署未有妥善打理煙蒂箱，衞生情況惡劣，認為該署應加強巡查轄下設施，以確保沒有對環境衞生構成負面影響。