好多國家都大灑金錢去探索宇宙，其實不如花錢用於照顧我哋嘅地球好過啦。而且，要探索其他星體，喺地球一樣得，不妨好似我咁專注了解來自天王星嘅美人中川杏奈啦！
小弟讀書嘅時候暗戀嘅對象有好多，可能係我多情，亦可能係我口味廣闊啦。曾經，小弟暗戀過阿慧，一個清麗脫俗又讀得書嘅女仔；亦暗戀過阿儀，一位樣子普通，身形健美又結實嘅運動型女孩；又暗戀過阿欣，呢位同我話題不絕，仲好識得搞笑又玩得嘅女仔。正所謂三歲定八十，呢三個唔同類型嘅女仔到家陣我都係咁鍾意，亦難怪我對中川杏奈情有獨鍾，因為佢一個人集齊晒以上三個特點。
現年28歲嘅杏奈臉上散發住活潑青春氣息，活力唔會過火，更加唔會遮掩本來嘅清麗脫俗氣質，加埋一把長直髮真係幾迷人。擁有清麗面孔嘅女仔一般身材都比較弱質纖纖，但係杏奈就唔同喇，肌膚帶點古銅色，加上肉地結實同健美嘅身形，一睇就知佢相當好動兼成日做運動，直情係體力爆棚。
雖然中川杏奈家陣喺日本水着界名氣不少，但係佢唔似得其他女優咁，一出道就佔一席位，正確嚟講阿妹出道時未諗住拍水着寫真。杏奈踏足藝能界之初，乃係透過選拔活動成為搞笑女子組合「天王星偶像」嘅成員，故杏奈有「天王星奈奈」稱號。同其他組員一齊喺綜藝節目進行搞笑嘅時候，杏奈嘅角色通常都係畀人窒畀人玩。由於杏奈人又甜美身材又好，後來被人發掘去拍寫真，同時仲同川村杏奈組成「W∞杏奈」，同樣都係以搞笑為主。2013年由於川村杏奈宣告引退，組合亦隨之解散，唔知係咪因為好姊妹離開，令到佢都唔想做落去，喺2014年阿妹宣告引退。而喺引退期間，杏奈收到好多粉絲對佢表示支持，令佢萌生復出之念，今年年中終於再次同大家見面，杏奈話喺引退期間學識咗唔少技能，希望真正引退嘅時候可以轉職做OL，如果係真的話，做佢男同事就發達啦！
簡介：中川杏奈除咗鍾意搞笑，亦喜歡下廚，大家可以喺佢嘅博客當中見到阿妹成日變身美女廚神，想知道阿妹今晚煮乜餸？就要Click上去睇喇！
網址：http://ameblo.jp/nakagawaanna/
年齡：28歲
身高：5呎4吋
三圍：32-23-33
撰文：賢