古人話，居安思危，思則有備，有備無患。港產官僚啱啱相反，反應遲鈍，後知後覺，經常等到出事至補鑊，唔怪得香港食物安全漏洞百出，事故頻生喇。
話說早前有市民網購台灣三文治及韓式醬蟹導致食物中毒，暴露本港監管網購食品問題多多，法例形同虛設。事隔幾個月，當局終於出招補鑊，計劃明年首季推出新措施，向領有食物業牌照或許可證處所施加新條件，凡係網售食物，須喺網站及宣傳品標示牌照號碼及地址供消費者查證，並增設新許可證畀冇實體店舖卻喺網上銷售食物嘅經營者申請，兩款許可證同時規定持證人運送食物過程需確保食物時刻保持衞生及保存喺合適溫度。
嗱，早就應該咁做喇。係人都知，隨着互聯網日漸普及，網購食品已經成為市民日常生活一部分，弊在當局唔識與時並進，冇加強監管，搞到網購食品泥沙俱下，七國咁亂。正所謂，他山之石，可以攻玉。好多地方已經先行一步，德國設有專責機構抽驗網上食品，而內地亦正修例規定經營者必須取得食品生產經營許可，反觀港府拖拖拉拉，依家至肯堵塞漏洞，遲唔遲啲吖。可以話，本港近年接二連三爆出網購食品事故，不良業界罔顧公德固然責無旁貸，港產官僚敷衍塞責同樣難辭其咎吖！
香港自詡國際都會，點知監管網購食品連內地都不如，講出嚟都丟架。話時話，港產官僚渾渾噩噩，點止網購食物無王管吖。好似針對食物重金屬含量法例咁，本港亦嚴重落後，肉類、蔬菜以及奶類等安全標準全部遠低於其他先進地區，部分含鉛標準甚至比國際水平寬鬆六十倍，簡直匪夷所思。唔怪得近年食安危機警鐘長鳴，三聚氰胺奶粉、塑化劑食品、孔雀石綠海產、蘇丹紅禽蛋、坑渠油……港府次次都要靠外地通報或者傳媒踢爆至知道，問你服未。
除咗食物之外，食水一樣危機四伏。繼爆出鉛水風波，近日多個水塘食水又被驗出含致癌化合物，揭發本港原來並無為有關物質設定安全標準，你話當局把關幾兒戲吖。港產官僚高薪厚祿，但係返工好似夢遊咁，乜都唔識做，次次都要等到出事至補鑊，簡直搵市民生命健康較飛。
一句講晒，遲到好過無到。當局既然補鑊規管網購食品，就要認真把關，唔好又係敷衍了事，得過且過，否則有法例等於冇法例嘅咋。正如業界人士話齋，部分食品銷售商只透過手機程式代購海外食品，有啲甚至直接從外地網站訂購食品到港再分銷，連網站都冇，如果當局執法求其，又點可以確保網購食品唔會出事呢？