政情：傘兵當選都靠蛇齋餅糉
泛民主派議員成日鬧建制派用「蛇齋餅糉」籠絡民心，但有當選傘兵就覺得「蛇齋餅糉」無咩唔好，仲靠「蛇齋餅糉」成功氹掂選民。當選為今屆最年輕嘅區議員、廿二歲黃學禮（阿禮）今年大學畢業，工都未搵就出戰沙田區議會松田選區，佢話作為傘兵除咗要打政治議題，亦都要勤力做地區工作，「蛇齋餅糉」唔少得。
阿禮話，大半年前開始有意參選，於是開始喺沙田做地區工作，唔止宣傳政治理念，連「蛇齋餅糉」都樣樣做足，「嗰時參選除咗個個星期幫街坊量血壓，試過上門派糉畀街坊，又搞過本地旅行團，去鯉魚門食海鮮，今個月仲會搞埋秋冬蛇宴添！區議會始終要搞呢啲地區服務。」
阿禮怕拎唔到回鄉卡帶團
雖然明年一月一日先正式上任區議員，但阿禮已經準備多項計劃，除咗急住搵辦事處外，仲打算申領回鄉卡，帶街坊去內地旅行。
不過，作為中大本土學社前成員，阿禮都擔心不獲發回鄉卡，攞唔攞到就真係要試過至知喇。