政情：挑戰卿姐 林卓廷認未夠班
好多從政人都係得一就想二，好似民主黨（白鴿黨）總幹事林卓廷喺區議會選舉北區上水石湖墟勝出後，會積極爭取黨內支持出戰明年嘅立法會新界東直選，外界仲傳佢想接替立法會議員劉慧卿出任白鴿黨主席添！卿姐都未言退，阿廷當然唔敢咁露骨，耍手擰頭話自己未夠班，因為佢唔係立法會議員，亦未夠知名度喎。咁講法係咪入咗立法會就會爭黨主席呢？
阿廷坦言，會積極爭取再踏新界東戰場，但佢覺得派出兩隊人參選係過於進取，應該集中火力，所以如果卿姐繼續連任新界東議席，佢就會繼續「默默耕耘」做住先。至於超級議席方面，佢就講到明無意參選喇，因為自覺未夠級數喎。阿廷講到好似望「卿」打卦咁，係咪想畀壓力卿姐先？
提議增設黨魁話事
被問到係咪一旦成功當選立法會議員就會挑戰卿姐嘅黨主席寶座？阿廷就話現時嘅政治環境，政黨工作都好繁重，或者可以增設黨魁一職，唔一定要由立法會議員擔任黨主席喎。咁講即係搞「雙辦事人」啦，到時邊個話事呢？