中環出更：《版權修訂》二讀Greg蘇急戴頭盔
被網民謔稱為「網絡二十三條」嘅《2014年版權（修訂）條例草案》將於下周三在立法會恢復二讀，政府除咗要面對網民喺社交網站「洗版」呼籲反對草案，更可能要面對獨立議員黃毓民早前就草案提出嘅九百多項拉布式修訂。不過，商務及經濟發展局局長蘇錦樑（Greg蘇）潛水多日，尋日先至急忙為草案解畫，似乎係想戴定頭盔以防再次甩轆。
指跟足國際標準
《版權修訂》條例三年前因為部分泛民議員拉布下胎死腹中，政府其後就草案重新諮詢公眾，並鐵定下周再提交立法會二讀，但網上反對浪潮依然洶湧。Greg蘇尋日出席亞洲知識產權營商論壇專題午宴演講後，終於識得派定心丸，強調一直有同各位議員就議題充分合作，指《版權修訂》條例跟足國際標準推行，冇收窄任何言論自由，反而為業界製造好多高增值、有創意嘅經濟機會，仲耍冧讚年輕人喺呢方面創作能力高，希望大家從唔同角度去看待條例喎。
不過，網民一於少理，除咗連日積極收集反對條例通過嘅聯署，仲計劃明日發起集會；而民主黨尋日亦發聲明會投票反對法案。睇怕Greg蘇唔單止要同議員合作，仲要多啲向網民交代至得嘞，咪淨係掛住同明星影相「集郵」至得（口架）！
卓妮