中環出更：發展高科技 工業 遇「強」愈強
香港青年工業家協會暨基金會早前舉行就職禮，成謙實業主席張華強（Jacky）接替嚴志明成為新一任會長，講起過往協會於唔同學校舉辦演講嘅經歷，Jacky就話好驚訝好多同學及老師一講起工廠都淨係諗起穿膠花，對工業印象仲停留喺以前電視劇嘅畫面，其實依家啲廠房好先進，有啲仲有落地玻璃，環境好靚，同以前已經唔同晒。
本身做代工生產喇叭及耳機等音響產品嘅Jacky，當年畢業投身公務員行列，後來儲夠錢供完樓就離開政府闖天下，由開始經營貿易生意，及後與兩岸廠家合作，成為工業界一分子。佢話現時香港主力做高增值工業，唔單止廠房環境先進，產品亦愈來愈高科技，好似耳機過往只係單向播放音樂，現時最新款耳機可感應同測量用家心跳，方便喜愛跑步或做運動的人士。
提到廠房環境改變，執行委員張綺媚就話，佢哋喺江西廠房附近有一間員工家屬專屬幼稚園，等員工唔使為子女撲學校，而深圳及江西廠附近均有旗下住宅物業讓員工以八折價錢購置物業，一條龍配套可以令員工流失率降低，唔使擔心請唔到人之餘，有啲員工更加三代人都喺佢哋公司工作添。
陳家偉為工展會棄外遊
同場仲有接棒成為基金會會長嘅史立德、基金會前會長顏吳餘英、秘書長戴麟、執行委員陳家偉及楊少聰等。陳家偉話，每逢臨近年尾都比較忙，仲透露已經有十五年冇試過喺聖誕期間外遊，因為要籌備工展會工作，順便留港消費，起碼要到農曆新年先可以同家人旅行滑雪喇。
卓妮