眨吓眼，強積金已經推行十五年，呢項名為保障打工仔退休生活嘅計劃，唔止達唔到目的，反而添煩添亂，尤其係收費高、回報低更成為揮之不去嘅噩夢。好似今年咁吖，由於金融市場波動，強積金虧損嚴重，簡直係水瓜打狗，唔見一橛。
有數你睇，直至今年九月強積金整體虧損接近一成，平均每名打工仔唔見超過兩萬元，都咪話唔傷。當然喇，有人歡喜有人愁，唔係個個都係輸家o架，喺風高浪急之下，強積受託人唔單止冇損失，收入仲不減反增，問你服未。
嗱，立法會資料顯示，強積金累積資產已由○七年約二千一百幾億元，上升至今年三月底接近六千億元，行政費用水漲船高，由○七年嘅四十四點四億元，飆升到今年嘅九十六點四億元，增幅超過一倍；淨係同去年比較咋，行政費用就增加一成有多，直情好似豬籠入水咁。
港府吹水唔抹嘴，一直強調強積金整體表現跑贏通脹，其實係呃鬼食豆腐，到頭來受託人至係真正贏家。唔理強積金賺又好，蝕又好，佢哋一樣旱澇保收，穩坐釣魚船，而且隨着強積金不斷累積，資產愈來愈龐大，行政費用只會愈來愈多，受託人想窮都幾難。
有人話強積金係一個世紀大騙局，真係冇講錯。強積金話就話為咗保障打工仔退休生活，其實係養肥咗一班受託人，當局為咗掩人耳目，近年對強積金修修補補，一時搞半自由行，一時又話設立核心基金，可惜姿勢多過實際，根本解決唔到收費高、回報低嘅問題。早前有項調查發現，半自由行推行至今，基金收費只係輕微下調，喺三十八個強積金計劃共五百三十七隻基金中，近四成半收費高於百分之一點六二嘅平均數，加上唔少基金回報低於通脹、盈富基金及外匯基金，所謂保障打工仔退休生活，純粹係大隻講。
唔係誇張o架，有位清潔工供款十四年，到退休時，經對沖後強積金只剩十二萬元，莫講話保障退休生活，連維持目前生計都成問題，無奈之下焗住要再搵工做；有位六十六歲清潔女工仲慘，退休對沖後強積金只有三萬八千元，唔夠一年就使晒，結果要靠執紙皮維生。
唔好以為只係個別現象吖，基層打工仔臨老唔過得世嘅例子屢見不鮮。講到底，港府遲遲唔肯落實全民退休保障制度，一味對強積金小修小補，擺明敷衍民意，推卸責任。好簡單，當局連推行公共信託人制度，降低強積金收費都唔肯，就知道港產官僚究竟有冇以民為本。