區議會選舉結束，各黨派開始為明年立法會選舉部署，有多名年輕黨員當選嘅民主黨（白鴿黨），最近爆發「乳鴿」爭位戰。身兼白鴿黨副主席嘅南區區議員羅健熙，日前喺社交網站表態支持其好友柴文瀚出戰立法會港島區直選，明踩有「峯鴿」之稱嘅中西區區議員許智峯。
尋日就有「峯鴿」陣營中人踢爆，該黨的民調顯示許智峯出戰「超級區議會」嘅支持度比羅健熙更高，暗示如果羅健熙力撐柴文瀚出選港島，就應該讓出「超選」參選名額畀許智峯！
消息指出，白鴿黨曾於區選前秘密進行民調，讓選民就各黨派嘅潛在立法會參選人表態。在港島區，以現任議員單仲偕支持度最高，其他幾隻「乳鴿」相距不大。
在「超選」方面，扣除了「老鴿」涂謹申之後，居然以許智峯的支持度最高，拋離獲黨內主流派支持嘅羅健熙。
白鴿黨嘅立法會選舉甄選採取「八一一」機制，即地區民調結果佔八成，支部區議員及地區黨員意願僅各佔一成，前者對邊隻「乳鴿」最終可以出線極為重要。據悉白鴿黨會喺明年初進行第二輪民調，呢場「乳鴿」爭位戰仲有排打落去。