一批自動當選嘅區議員陸續提交選舉開支申報，其中民建聯（民記）眾參選人獲得民記嘅選舉捐贈有多有少，令人懷疑該黨厚此薄彼對待唔同參選人。舉例指，被視為灣仔區議會主席熱門人選嘅民記周潔冰，佢嘅選舉開支合共一萬五千多元，其中一萬二千多元獲黨捐贈，餘下嘅三千多元就要自行支付；黃大仙區議員黎榮浩嘅選舉開支合共約二萬二千元，就全數獲得捐贈，換言之一蚊都唔使畀。
盛傳明年可能接棒出戰立法會九龍東地方直選，連續多屆自動當選嘅觀塘區議員柯創盛，選舉開支達三萬二千多元，當中約二萬九千元獲黨捐贈，其他則要自掏荷包，盛惠三千多元。
究竟點解同屬民建聯參選人，有人只獲黨捐贈一萬多元，有人則獲捐贈約三萬元，有黨內中人解釋，該黨的選舉開支捐贈上限為選舉開支上限嘅一半，即三萬一千多元，主要用於選舉慣常用嘅物資清單，如海報、橫額、印製單張等，至於清單以外自行增設嘅宣傳品，如一比一人形紙牌等，就需要參選人自行付款嘞！