機場淪老鼠樂園 旅遊業雪上加霜

迪士尼樂園係本港著名旅遊景點之一,吸引唔少旅客到訪,不過咁,以後想睇米奇老鼠,睇怕唔使特登山長水遠去迪士尼咯,依家香港國際機場鼠輩橫行,成個老鼠樂園咁,落機即刻可以近距離接觸老鼠,問你怕未!

唔係靠嚇o架,機場的士站近年淪為老鼠樂園,被數以百計老鼠大軍攻陷。本報記者去睇過,鼠輩光天化日下或者會稍為收斂,入夜後就唔同講法嘞,佢哋目中無人,大搖大擺,當正草叢係遊樂場咁,玩到肚餓就跳入垃圾桶搵食,由於剩食多到食唔晒,啲鼠輩隻隻食到貓仔咁大,莫講話置身其中吖,諗起都毛管戙啦。

係人都知,國際機場係一個城市嘅門戶,亦係香港嘅招牌,一入門口就見大棚鼠輩迎賓,你話係咪失禮死人吖。香港國際機場話晒位居世界前列,因乜解究會淪為老鼠樂園呢?其實原因好簡單,就係垃圾多衞生差之嘛。

正如防治蟲鼠專家話齋,機場第一日就有老鼠,唔止的士站,連貨運站、跑道及停機坪都有老鼠出沒,而且「多到離晒譜」。由於有司機投訴,機管局半年前亦搵過外判滅鼠公司放「老鼠屋」做誘餌,以為可以一舉殲滅鼠患啦,點知機場老鼠好似知道有景轟,曉得對毒餌避之則吉,掂行掂過直接去草叢垃圾桶摷嘢食,情況完全無改善,連機管局都無晒符。

話時話,機場老鼠未必特別聰明過人,只係滅鼠方法特別低B就真。呢嗱,機場的士站一帶之所以鼠似雲來,只因有唔少司機亂丟食剩嘅飯盒,搞到周圍都係殘渣剩菜,嚴重影響環境衞生。你知啦,老鼠出名為食,見到有豉椒排骨飯、又有漢堡包、又有香噴噴嘅炸薯條,點會咁蠢去吼毒餌吖。所以話愚蠢嘅唔係老鼠,而係一味放老鼠屋嘅機場管理當局。

係人都知,老鼠生育力特別強,家族繁衍,攻城掠地,加上客運大樓餐廳林立,美食多多,遲早成為老鼠下一個搵食天堂嘅咋。再係咁落去,到時鼠輩喺客運大樓聯群結隊招搖過市,外國旅客嚇餐飽事小,咬到人就國際大事件嘞,萬一唔好彩走上飛機咬爛幾條電線,分分鐘釀成空難都似!

講到底,有鼠患必有懶貓,機場鼠患嚴重,其實只係冰山一角。港府管治無能,環境衞生情況每況愈下,鼠輩橫行各區早已經唔係新聞。香港旅遊業已步入寒冬,當局唔對症下藥搞好環境衞生,加強滅鼠,旅遊業只會衰多幾錢重,飽受鼠嚇嘅旅客返到祖家唔唱衰香港就奇,到時當局再花幾多個億搞宣傳都補唔番啦。