立法會政府帳目委員會尋日「公審」香港郵政混帳醜聞，多名委員質疑香港郵政連年蝕錢，係咪應該取消以自負盈虧嘅營運基金模式運作，轉番做一個政府部門以加強對市民嘅服務。有委員更踢爆，有立法會議員早於一年多前去信香港郵政，要求檢討營運基金運作模式，但郵政至今都未有回覆。大家估郵政署長丁葉燕薇點答呢？佢居然答佢哋係根據政府政策辦事！帳委會主席石禮謙就寸番佢，話唔通喺香港郵政眼中，政府政策就係收到信就擺埋一邊，乜都唔理？
