近期各政黨、團體排隊向特首梁振英表達對新年度施政報告嘅意見，絕大部分於事後都會大鑼大鼓會見傳媒，介紹佢哋向政府高層當面提出咩嘢建議，一旦於施政報告被採納更會高舉成功爭取嘅旗幟。不過，新界鄉議局尋日拉大隊見特首，事前無聯絡傳媒會後喺邊個地方會見傳媒，會面後亦靜悄悄拉大隊齊齊乘搭一早準備嘅旅遊巴離開，行蹤認真神秘。
據悉，鄉議局主席劉業強、一批鄉事委員會主席都有參加會面，會上提及多項施政報告建議，另有提及丁屋、僭建、農業發展等政策議題，歷時約一個多小時，有鄉委會主席會後更透露，今次會面氣氛和諧，似乎有意以免外間有不必要揣測。
談及外號「新界王」嘅鄉議局前主席劉皇發（發叔）嘅最新健康情況，發叔長子劉業強話，醫生指父親情況未穩定，因此要留院觀察喎。