政情：陳繁昌敢嘗試 考入皇仁
正所謂「自古成功在嘗試」，呢句話看似係老生常談，不過唔少人士嘅成功關鍵同勇於嘗試離不開關係。科大校長陳繁昌尋晚出席一個交流會同青少年分享人生經歷，佢話自己當年都係唔怕失敗一再嘗試，先至得以入讀心儀嘅名校。
成績未夠班 不獲申請表
陳繁昌憶述，以前先喺筲箕灣嘅慈幼英文中學讀書，其後聯同另一名同學齊齊到皇仁書院報讀預科，點知校方當時一睇陳繁昌嘅成績，就認為佢未夠班，連入學申請表都唔肯畀，相反同佢一齊報讀嘅同學就獲得取錄，陳對此結果當然感到失望。
然而過咗兩個禮拜，當日同行報名並獲取錄嘅同學向其透露，原來預科班仲有空缺，建議陳繁昌再次報讀，陳繁昌於母親鼓勵下決定再試一次。結果與當時皇仁副校長會面傾談就通過面試，成功入讀名校嘅預科班，陳繁昌自言就係因為呢次經歷，令佢更加深信唔試過就唔會成功嘅道理。